S a m þ y k k t i r

 

fyrir Kaupfélag Skagfirðinga

 

 

I. kafli.

 

Heiti félagsins, markmið og starfssvæði.

 

1. grein.

 

Félagið heitir Kaupfélag Skagfirðinga, skammstafað KS. Heimili þess og varnarþing er á Sauðárkróki.

 

2. grein.

 

Tilgangur félagsins er:

 

a) Að annast á sem hagfelldastan hátt hverskonar   viðskipti og þjónustu fyrir félagsmenn og aðra,  svo sem nánar er kveðið á í samþykktum þessum, eða aðalfundur félagsins ákveður á hverjum tíma.

b) Að efla atvinnulíf í héraðinu með beinni eða óbeinni þátttöku félagsins, svo sem stjórn þess og aðalfundur telja hentast hverju sinni.

c) Að styrkja framtíð félagsins með því að treysta fjárhag þess.

d) Að viðhalda og útbreiða þekkingu almennings á samvinnustefnu og aðferðum samvinnuhugsjónarinnar við að leysa félagsleg viðfangsefni.

 

3. grein.

 

Starfssvæði félagsins nær yfir öll sveitarfélög í Skagafjarðarhéraði.

 

 

II. kafli.

 

Aðild og ábyrgð félagsmanna.

 

4. grein.

 

Inngöngu í félagið fá konur og karlar sem eru fjárráða og undirrita yfirlýsingu um að þeir hlíti samþykktum félagsins. ófjárráða fólk, 14 ára og eldra,  getur fengið inngöngu, fái það ábyrgðarmann, sem kaupfélagsstjóri metur gildan. Félagsstjórn getur synjað manni inngöngu ef henni virðist ástæða til, en umsækjandi getur borið mál sitt undir aðalfund.

 

Þeir, sem eru fullgildir félagar í öðrum kaupfélögum, geta verið aukafélagar í KS og njóta þá annarra félagsréttinda en kosningaréttar og kjörgengis á félagsfundum.

 

5. grein.

 

Við inngöngu í félagið greiða menn inngöngueyri, sem aðalfundur ákveður árlega.  Úrsögn úr félaginu skal vera  skrifleg og sendist aðalskrifstofu þess. Tilkynna ber á sama hátt ef félagsmaður flyst brott af félagssvæðinu eða deyr.

 

6. grein.

 

Félagsmenn bera ekki fjárhagslega ábyrgð á félaginu og skuldbindingum þess nema með stofnsjóðsinnstæðum sínum og aðildargjaldi.

 

7. grein.

 

Félagsstjórn lætur halda félagaskrá, sem varðveitt er á skrifstofu félagsins. Nöfnum nýrra félagsmanna er bætt við hana jafnskjótt og þeir hafa gengið í félagið, en  felld brott, ef þeir ganga úr félaginu, andast eða flytjast brott af félagssvæðinu. Við brottflutning af félagssvæðinu á félagsmaður kost á að vera skráður sem aukafélagi.   Dagsetning þessara atriða er skráð í félagaskrána. Félagaskrá er skipt eftir félagsdeildum, sbr. ákvæði 9. greinar.

 

8. grein.

 

Ef félagsmaður vísvitandi vinnur gegn hagsmunum félagsins eða brýtur gegn ákvæðum laga nr. 22/1991 um samvinnufélög, getur stjórnin vísað honum úr félaginu.

 

Félagsmaður, sem gerður er brottrækur,  getur skotið máli sínu til næsta aðalfundar félagsins til úrskurðar.

 

III. kafli.

 

Skipulag félagsins, félagsfundir og stjórnarkjör.

 

9. grein.

 

Félagið skiptist í deildir eftir sveitarfélögum á félagssvæðinu, nema aðalfundur  ákveði annað. Skrá skal félaga í deild þar sem hann er búsettur.

 

Ekki geta færri en 10 félagsmenn myndað félagsdeild. Í aðalskrifstofu félagsins er haldin félagaskrá eftir deildum, og miðast kjör fulltrúa á aðalfund KS við félagsmannatölu deildar um næstu áramót á undan aðalfundi hennar.

 

10. grein.

 

Í hverri deild er árlega haldinn  aðalfundur, á undan aðalfundi félagsins,  og aukafundir þá er deildarstjóri telur þörf á eða fjórði hluti deildarmanna eða fleiri óska. Fundur er lögmætur ef hann er boðaður með minnst 6 sólarhringa fyrirvara.

 

Í aðalfundi deildar eru rædd deildarmálefni og hver önnur félagsmál, sem heyra undir álit og tillögur deildarmanna. Einnig eru á aðalfundi deildar ræddar allar tillögur um breytingar á samþykktum þessum, áður en þær koma fyrir aðalfund til afgreiðslu. Í aðalfundi deildar gerir kaupfélagsstjóri,  eða annar er hann setur til þess, grein fyrir hag félagsins, breytingum á félagsmannatölu og gefur aðrar þær upplýsingar, er ætla má að varði hag deildarmanna og viðskipti þeirra við félagið.

 

Í deildarfundum hafa allir deildarmenn málfrelsi og tillögurétt. Deildarmaður getur gefið öðrum umboð til þess að fara með atkvæði sitt. Fulltrúar félagsstjórnar hafa rétt til að mæta á deildarfundum og taka þátt í umræðum.

 

11. grein.

 

Í aðalfundi deildar er kosinn deildarstjóri og varadeildarstjóri. Kosning þeirra gildir til þriggja ára. Hver deildarmaður er skyldur  að taka kosningu í eitt kjörtímabil,  og ef hann skorast ekki undan, má kjósa hann svo oft sem vill. Þegar deildarstjóraskipti verða, tekur hinn nýi deildarstjóri þegar við öllum störfum, er stöðunni fylgja. Fráfarandi deildarstjóri  gerir full skil á öllum sínum störfum.

 

12. grein.

 

Störf deildarstjóra eru einkum þessi:

Hann boðar fundi í deildinni og stjórnar þeim og ber þar upp þau málefni, er deildarmenn varða og undir þá heyra.

Hann rekur erindi, er félagsstjórn eða framkvæmdastjóri fela honum í umboði félagsins innan deildarinnar.

Fyrir störf sín fær deildarstjóri hæfilega þóknun, er félagið greiðir honum samkvæmt ákvörðun stjórnar hverju sinni. Einnig ber að endurgreiða honum sannanlega útlagðan kostnað við störf sín.

 

13. grein.

 

Hver deild sendir fulltrúa á félagsfundi. Deildarstjóri er sjálfkjörinn, en auk hans er á hverjum aðalfundi deildar kosinn einn fulltrúi fyrir hverja 25 félagsmenn. Þegar 5 eða fleiri eru fram yfir þá félagatölu deildar, sem deilanleg er með 25, er bætt við einum fulltrúa. Félagsdeild, sem hefur færri en 25 félagsmenn, kýs þó fulltrúa. Tölu fulltrúa skal takmarka þannig, að ein deild geti aldrei haft hreinan meirihluta á félagsfundi. Í aðalfundum deilda þarf einnig að kjósa varafulltrúa, sem  sækja félagsfundi í forföllum aðalfulltrúa. Skylt er að viðhafa listakosningu, ef 1/10 hluti deildarmanna óskar þess bréflega við deildarstjóra eigi síðar en 4 sólarhringum fyrir aðalfund deildar. Að kjöri loknu er gefið út kjörbréf, sem gildir til næsta aðalfundar deildarinnar. Deildarstjóri undirritar kjörbréfið og sendir það svo fljótt sem verða má til aðalskrifstofu félagsins.  Kaupfélaginu ber, eftir ákvörðun aðalfundar, að greiða fulltrúum þóknun fyrir að sækja félagsfundi.

 

14. grein.

 

Aðalfundur er æðsta vald í málefnum félagsins og tekur þær ákvarðanir um starfsemi þess, sem þörf er á. Aðalfund skal halda innan sex mánaða frá lokum reikningsárs. Aukafundi getur félagsstjórn boðað, þegar hún telur þörf á, og er henni ennfremur skylt að boða til aukafundar ef 10% félagsmanna krefjast þess eða þriðjungur félagsdeilda. Slík krafa þarf að vera skrifleg og greina fundarefni. Hafi stjórnin eigi boðað til slíks fundar innan 14 daga frá því krafa um fund berst, er með farið svo sem kveður á í 19. grein laga nr. 22/1991. Félagsfundur er lögmætur, ef a.m.k. helmingur kjörinna fulltrúa deilda mætir á fundinn. Skriflegt fundarboð,  ásamt með dagskrá,  berist fulltrúum a.m.k. 7 sólarhringum fyrir félagsfund. Hyggist félagsstjórn leggja fyrir aðalfund tillögur um breytingar á samþykktum þessum eða um meiriháttar breytingar á starfsemi félagsins, ber henni að gera grein fyrir þeim í fundarboði.

 

Á félagsfundi eiga sæti með málfrelsi og tillögurétti, auk kjörinna fulltrúa deilda, félagsstjórn, framkvæmdastjóri og skoðunarmenn ásamt  löggiltum endurskoðanda félagsins. Ennfremur hafa félagsmenn aðgang að félagsfundum.  Fulltrúar eiga þó einir atkvæðisrétt og er hann jafn fyrir alla fulltrúa. úrslitum mála á félagsfundum ræður afl atkvæða nema þar sem lög eða samþykktir þessar kveða á um aukinn meirihluta. Tillaga telst fallin á jöfnum atkvæðum,  en hlutkesti skal ráða við kjör í stjórn og nefndir,  falli atkvæði jöfn.

 

Á aðalfundi skal taka fyrir eftirfarandi mál:

   Skýrslu stjórnar

   Skýrslu framkvæmdastjóra

   Skýrslu skoðunarmanna og endurskoðanda

   Ársreikninga félagsins

   Tillögur stjórnar og félagsdeilda

   Ákvörðun um ráðstöfun hagnaðar eða taps

   Ákvörðun um laun stjórnar og skoðunarmanna

   Kosningar stjórnar, skoðunarmanna, fulltrúa á aðalfund

   Sambandsins og í þær nefndir og ráð er aðalfundur kýs.

   Umræður og fyrirspurnir um þau mál önnur, er löglega eru fram borin á fundinum.

 

Fundargerðir eru ritaðar í sérstaka fundargerðabók. Að venjulegum fundarstörfum loknum er fundargerðin lesin upp og lýst eftir athugasemdum. Loks er fundargerð undirrituð af riturum og fundarstjóra.

 

Stjórn félagsins setur félagsfundum reglur um fundarsköp, sem öðlast gildi að fengnu samþykki aðalfundar.

 

15. grein.

 

Stjórn félagsins skipa 7 menn, sem aðalfundur kýs til 3ja ára í senn. Í aðalfundi eru ennfremur kosnir 3 varamenn í stjórn til eins árs í senn og taka þeir stjórnarsæti í þeirri röð, sem atkvæðafjöldi þeirra segir til um. Allir félagsmenn eru skyldir  að taka kosningu í eitt kjörtímabil og  skorist þeir ekki undan, má endurkjósa þá svo oft sem vill. Engan má kjósa í stjórn, sem ekki er félagsmaður. Starfsmannafélag KS hefur heimild til að kjósa einn áheyrnarfulltrúa til setu á stjórnarfundum. Hefur sá fulltrúi málfrelsi og tillögurétt en eigi atkvæðisrétt. Starfsmannafélagið  leggur reglur sínar um kjör fulltrúans fyrir stjórn KS til samþykktar og mega þær í engu brjóta gegn ákvæðum samþykkta þessara né landslögum.

 

Stjórnin kýs formann, varaformann og ritara úr sínum hópi til eins árs í senn. Formaður kveður til funda og stjórnar þeim. Stjórnarfundur er lögmætur ef meira en helmingur stjórnarmanna er á fundi. Mikilvægar ákvarðanir skal þó ekki taka án þess að allir aðalmenn í stjórn hafi átt þess kost að fjalla um þær, sé þess kostur. úrslitum mála ræður afl atkvæða, en séu þau jöfn, ræður atkvæði formanns.  Allar fundargjörðir eru skráðar í sérstaka gjörðabók, og skrifa viðstaddir stjórnarmenn undir þær að fundi loknum.

 

Stjórnin boðar til félagsfunda og undirbýr fundarmálefni, framkvæmir fundarályktanir og annast stjórn félagsins milli funda. Hún leggur fyrir aðalfund til úrskurðar endurskoðaða reikninga fyrir næstliðið reikningsár. Hún hefur eftirlit með eignum félagsins, gætir hagsmuna þess í öllum greinum og leitar til þess, ef þörf krefur þeirra leiða, er lög heimila.

 

Laun stjórnar eru ákveðin af aðalfundi.

 

16. grein.

 

Stjórn félagsins ræður  framkvæmdastjóra, felur honum daglegan rekstur félagsins og þau af störfum sínum, er henni þykir henta og lög heimila. Stjórnin gerir skriflegan samning við framkvæmdastjóra um starfssvið hans og kjör. Skal samningur sá vera uppsegjanlegur af beggja hálfu með sex mánaða fyrirvara, nema brotið sé alvarlega gegn ákvæðum hans, samþykktum þessum eða landslögum. Undir slíkum kringumstæðum getur stjórnin vikið framkvæmdastjóra fyrirvaralaust frá störfum.

 

Framkvæmdastjóri ræður annað starfslið félagsins og segir því upp störfum. Hann hefur samráð við stjórn félagsins um ráðningu í stjórnunarstöður. Framkvæmdastjóri hefur  ekki heimild til ráðstafana, er teljast óvenjulegar eða mikilsháttar, án samráðs við stjórn félagsins, nema ekki sé unnt að bíða ákvarðana félagsstjórnar án verulegs óhagræðis fyrir starfsemi félagsins. Í slíkum tilvikum ber framkvæmdastjóra að tilkynna stjórninni þegar í stað um ráðstöfunina. Framkvæmdastjóri má ekki eiga setu í stjórn félagsins. Hann sér um að ákvörðunum stjórnar félagsins sé framfylgt og gætir hagsmuna þess á öllum sviðum. Félagsstjórnin fylgist  með því að nægilegt eftirlit sé með bókhaldi félagsins og fjárreiðum. Hún gætir hagsmuna þess út á við og svarar fyrir þess hönd fyrir dómstólum. Félagsstjórnin veitir framkvæmdastjóra og öðrum þeim starfsmönnum félagsins, er hún telur nauðsyn til bera prókúruumboð fyrir félagið.

 

Framkvæmdastjóri  gerir  ár hvert aðalfundi grein fyrir störfum sínum og stjórninni, hvenær sem hún óskar þess. Hann eða sá, er hann setur til þess, mætir á aðalfundi deilda og gerir þar grein fyrir hag félagsins sbr. 10. grein samþykkta þessara.

 

17. grein.

 

Aðalfundur velur félaginu tvo skoðunarmenn reikninga og einn löggiltan endurskoðanda eða endurskoðunarfélag í samræmi við 68. grein laga nr. 22/1991. Endurskoðendur og skoðunarmenn kanna reikningshald félagsins, meðferð fjármuna þess og annað, er að góðri endurskoðunarvenju lýtur. Skoðunarmenn séu félagsmenn, en mega ekki vera í stjórn félagsins eða gegna ábyrgðarstöðum innan þess. Þeir skulu vera fjár síns ráðandi og lögráða. Kjör skoðunarmanna gildir til tveggja ára í senn. Með sömu skilyrðum eru kjörnir tveir varaskoðunarmenn til eins árs í senn.

 

Um störf skoðunarmanna og endurskoðanda gilda að öðru leyti ákvæði X. kafla laga nr. 22/1991

 

IV. kafli

 

Ársreikningur félagsins og ársskýrsla stjórnar.

 

18. grein.

 

Reikningsár félagsins er almanaksárið. Stjórnin skal í samræmi við ákvæði IX. kafla laga nr. 22/1991 láta semja ársreikning fyrir hvert reikningsár ásamt  samstæðureikningi fyrir KS og þau félög, sem það er eigandi að með þeim hætti, að eignaraðildin geti haft úrslitaáhrif á töku ákvarðana í félaginu. Írsreikningur félagsins geymir efnahagsreikning, rekstursreikning og skýringar í samræmi við góðar reikningsskilavenjur.

 

Ársreikningur og samstæðureikingur eru undirritaðir af stjórn félagsins og framkvæmdastjóra.

 

19. grein.

 

Á aðalfundi flytur stjórnarformaður skýrslu stjórnar um starf hennar frá síðasta aðalfundi. Hann  gerir þar grein fyrir bókuðum fundum stjórnarinnar, helstu ákvörðunum og þeim atriðum öðrum, er varða afkomu félagsins og stöðu þess. Þar er einnig gerð grein fyrir slíkum atriðum, er fram hafa komið frá lokum reikningsársins til þess tíma, er aðalfundur er haldinn. Einnig er upplýst um fjölda félagsmanna og breytingar á félagaskrá og B-hluta stofnsjóðs, ef og þegar ákvörðun verður tekin um stofnun hans.  Í ársskýrslu framkvæmdastjóra er gerð grein fyrir fjölda starfsmanna, heildarfjárhæð launa og þóknana til starfsmanna félagsins og stjórnar og öðrum þeim atriðum er varða rekstur félagsins og félagsstjórn felur honum.

 

V. kafli.

 

Stofnsjóðir félagsins.

 

20. grein.

 

Stofnsjóður félagsins er myndaður af séreignarhlutum félagsmanna. Í hann er lagt aðildargjald þeirra og sá hluti hagnaðar, sem aðalfundur ákveður eftir að dregið hefur verið frá tap, sem ekki hefur verið jafnað áður og fé lagt í sjóði félagsins skv. lögum og samþykktum þessum. Verði tekin ákvörðum um stofnun B-hluta stofnsjóðs í samræmi við ákvæði í VII. kafla laga nr. 22/1991, verður sá hluti stofnsjóðs, sem þessi grein fjallar um, nefndur A-hluti.

 

Einungis félagsmenn geta átt séreignarhluta í A-deild stofnsjóðs félagsins, en í B-deild þeir, sem hafa keypt hluti og fengið í hendur samvinnuhlutabréf í samræmi við það.

 

21. grein.

 

Írlega ber að vaxtareikna og/eða verðbæta séreignarhluti í stofnsjóði. Til viðmiðunar eru hafðir almennir sparissjóðsvextir og verðbætur á slíkar innstæður. Stjórn félagsins ákveður hlutfall vaxta og verðbóta  hvert reikningsár fyrir sig. Verði stofnuð B-deild stofnsjóðs við félagið, þarf að hafa í huga ákvæði 40. og 41. greinar í VII. kafla laga nr. 22/1991 varðandi vextina. Stofnsjóður, A-deild er notaður við rekstur félagsins. Séreignarhluti félagsmanns kemur til útborgunar við andlát hans, við brottflutning af félagssvæðinu eða eftir 70 ára aldur, óski hann þess. útborgun séreignarhluta má fresta til upphafs næsta almanaksárs, eftir að réttur til útborgunar stofnast, telji stjórn félagsins það nauðsynlegt.

 

22. grein.

 

Heimilt er að stofna B-deild stofnsjóðs Kaupfélags Skagfirðinga sbr. VII. kafla laga nr. 22/1991 um samvinnufélög. Heildarfjárhæð B-deildar nemi kr. 20.000.000 hið lægsta og kr. 80.000.000 hið hæsta. Aðalfundur félagsins getur þó ákveðið hækkun efri marka, þegar heildarfjárhæð seldra hluta í sjóðnum nemur kr. 60.000.000 eða meiru. Hver hlutur í B-deild er ein króna og getur hvert hlutabréf haft að geyma svo marga hluti, sem hentugt þykir. Samvinnuhlutabréf í B-deild stofnsjóðs félagsins hljóða á  nafn og eru flokkuð og tölusett í áframhaldandi númeraröð. Stjórn félagsins heldur skrá yfir hlutabréfin í löggiltu formi. Er hún ætíð geymd á skrifstofu félagsins og eiga allir hluthafar aðgang að henni og geta kynnt sér efni hennar.

 

Í hlutaskrá skal greina:

     Útgáfudag bréfsins, nafnverð og útgefin jöfnunarhlutabréf, til handa hverjum bréfið var upphaflega gefið út, dagsetningu og nöfn vegna síðari eigendaskipta. Ennfremur sé getið heimilis og kennitölu hluthafa. Þá sé einnig getið í hlutaskrá innlausnardags og ógildingardags, t.d. ef bréfið er ógilt með dómi.

     Gagnvart félaginu skoðast hlutaskráin sem fullgild sönnun fyrir eignarrétti á hlutabréfi í B-deild stofnsjóðs félagsins og eru jöfnunarhlutabréf, arður og hverskonar tilkynningar sendar þeim, sem á hverjum tíma er skráður eigandi viðkomandi hlutabréfs. Félagið ber enga ábyrgð á því ef sendingar til hluthafa misfarast vegna þess, að vanrækt hefur verið að tilkynna félaginu um aðsetursskipti. Nú glatast hlutabréf og skal þá eigandi þess fá nýtt bréf í hendur jafnskjótt og félagsstjórn hafa verið færðar sönnur á, að fenginn hafi verið ógildingardómur á hinu glataða bréfi. Ef hlutabréf skemmist þannig, að eigi verður um villst um flokk þess, tölu eða efni, getur eigandi þess fengið nýtt hlutabréf á sinn kostnað gegn því að skila aftur hinu skemmda bréfi. Skyldur og réttindi hluthafa í B-deild stofnsjóðs félagsins skulu prentuð á bakhlið útgefinna bréfa.

     Að tekinni ákvörðun stjórnar Kaupfélags Skagfirðinga um sölu hluta í B-deild stofnsjóðs félagsins, auglýsir hún á tryggilegan hátt um söluna og tekur þar fram þá heildarfjárhæð, sem til sölu er svo og um söluskilmála í samræmi við 49. grein laga nr. 22/1991. Félagsfundur getur ákveðið, að félagsmenn kaupfélagsins og/eða eigendur séreignarhluta í A-deild stofnsjóðs eigi forkaupsrétt að hlutum innan tiltekins frests. Að afloknum slíkum fresti er félagsstjórn heimilt að selja hluti hverjum er kaupa vill.

     Hlutum í B-deild stofnsjóðs fylgir ekki atkvæðisréttur á félagsfundum, en eigendur hluta hafa rétt til fundarsetu, málfrelsi og tillögurétt. Ennfremur kröfurétt til arðgreiðslu og tillögugerðar þar um skv. ákvæðum í 2. mgr. 41. gr. laga nr. 22/1991.

     Eigendur hluta í B-deild stofnsjóðs hafa rétt til greiðslu arðs af hlutum sínum og greiðist arður til B-deildar, áður en greitt er til A-hluta stofnsjóðs hlutdeild í tekjuafgangi. Arð má því aðeins greiða, að töp hafi verið jöfnuð og greitt til varasjóðs félagsins svo sem lög kveða á um. Félagsfundi er heimilt að ákveða, að gefin verði út jöfnunarhlutabréf í stað arðgreiðslu eða hluta hennar.

 

VI. kafli.

 

Um félagsráð afurðastöðvanna.

 

23. grein.

 

Afurðastöðvum þeim, er félagið rekur, má setja sérstakar, ráðgefandi stjórnarnefndir, er nefnast samlagsráð og sláturhúsráð. Skulu þær skipaðar 5 mönnum. Þrír þeirra eru kjörnir úr hópi framleiðenda þeirra afurða, er hvor afurðastöð um sig tekur til vinnslu. Að auki skal framkvæmdastjóri félagsins sitja í báðum ráðunum auk eins fulltrúa stjórnar félagsins. Samlags- og sláturhúsráð eru ráðgefandi fyrir stjórn KS og gera tillögur um starfshætti afurðastöðvanna og ráðstafanir í rekstri þeirra. Sérstakar reglugerðir ber að setja um hvort ráð fyrir sig, um starfsemi afurðastöðvanna, kosningu fulltrúa í ráðin og annað er þau varðar. Þær reglugerðir verða viðauki við samþykktir þessar og fylgja þeim.

 

VII. kafli.

 

Ýmis ákvæði.

 

24. grein.

 

Heimilt er félaginu að styðja hverskonar menningarstarfsemi á félagssvæðinu og stofna og starfrækja sjóð í því skyni.

 

Aðalfundur ákveður framlög til sjóðsins og setur honum starfsreglur.

 

25. grein.

 

Stjórn félagsins og aðalfundur geta ákveðið, að félagið taki þátt í öðrum félögum og samtökum, svo sem með hlutafjárframlögum, þátttöku í samvinnusamböndum eða á annan hátt sem þessir aðilar telja að  þjónað geti hagsmunum félags og félagsmanna. Stjórn félagsins gerir í ársskýrslu sinni  grein fyrir þeim ráðstöfunum, sem hún hefur gert á þessu sviði milli aðalfunda.

 

26. grein.

 

Um slit og skráningu félagsins, svo og um önnur þau atriði, er samþykktir þessar taka ekki til, gilda ákvæði laga um samvinnufélög nr. 22/1991.

 

27. grein.

 

Breytingar á samþykktum þessum öðlast því aðeins gildi, að um þær hafi verið fjallað á tveimur aðalfundum í röð og á milli þeirra hafi þær verið kynntar á öllum deildafundum félagsins. Við síðari afgreiðslu á aðalfundi þarf samþykki minnst 2/3 hluta greiddra atkvæða á fundinum.

 

28. grein.

 

Með gildistöku samþykkta þessara falla úr gildi eldri samþykktir félagsins.

 

ÁKVÆÐI TIL BRÁÐABIRGÐA.

 

Meðan ekki verða sett ný lög eða reglugerð um starfsemi innlánsdeilda samvinnufélaga, verður starfsemi Innlánsdeildar KS  með óbreyttum hætti frá því, sem verið hefur.

 

 

 

 

REGLUGERÐ FYRIR MJÓLKURSAMLAG KAUPFÉLAGS SKAGFIRÐINGA.

 

 

1. grein.

 

Í félagssvæði Kaupfélags Skagfirðinga starfar afurðastöð á Sauðárkróki sem heitir Mjólkursamlag Kaupfélags Skagfirðinga, skammstafað M.K.S. Mjólkursamlagið er stofnun innan Kaupfélags Skagfirðinga með þeirri sérstöðu, sem í þessari reglugerð felst.

Stjórn Kaupfélags Skagfirðinga fer með yfirstjórn þess að fengnum tillögum samlagsráðs.

 

2. grein.

 

Markmið samlagsins eru:

1. Að tryggja framleiðendum markað fyrir mjólk þeirra og vinna úr henni þær vörur, sem best henta til sölu á hverjum tíma.
2. Að leiðbeina samlagsmönnum um meðferð mjólkurinnar, áður en hún kemur í afurðastöðina og um hverskonar vöruvöndun í því sambandi.

 

Til að ná þessum markmiðum getur stjórn KS ákveðið, að mjólkursamlagið gerist aðili að sölusamtökum og félögum afurðastöðva innan greinarinnar.

 

3. grein.

 

Samlagssvæðið er hið sama og félagssvæði Kaupfélags Skagfirðinga, og geta þeir einir orðið samlagsmenn sem hafa leyfi til mjólkurframleiðslu.

 

Samlagsmenn  afhenda samlaginu til vinnslu alla þá mjólk er þeir framleiða umfram heimilisþarfir og er innan framleiðsluréttar.

 

4. grein.

 

Til ráðuneytis við stjórn samlagsins er 5 manna samlagsráð, sem er þannig skipað:

1. Þrír mjólkurframleiðendur kjörnir af ársfundi samlagsins til þriggja ára í senn. Til vara eru kjörnir tveir menn til eins árs í senn.
2.  Stjórn kaupfélagsins kýs einn fulltrúa úr sínum hópi og annan til vara til eins árs í senn til setu í ráðinu.
3. Kaupfélagsstjóri er jafnan sjálfkjörinn í samlagsráð og er hann jafnframt formaður þess. Í forföllum tekur staðgengill kaupfélagsstjóra sæti hans eða sá, er hann setur til þess.

 

Samlagsstjóra eða staðgengli hans er skylt að sitja fundi ráðsins og gera því grein fyrir störfum sínum og starfsemi samlagsins óski formaður ráðsins þess.

 

Samlagsráð sér um að reglugerð samlagsins sé framfylgt. Það er ráðgefandi um ákvarðanir, er varða rekstur samlagsins og fjárfestingar, svo og um ráðningu samlagsstjóra og önnur mál, er varða samskipti samlagsins og framleiðenda.

 

Kaupfélagsstjóri kallar samlagsráð til funda þegar þörf gerist eða a.m.k. 2 samlagsráðsmenn óska.

 

5. grein.

 

Meðferð mjólkurinnar og önnur atriði er varða mjólkurframleiðsluna séu í samræmi við reglugerð um mjólk og mjólkurvörur, er heilbrigðis og tryggingaráðherra setur hverju sinni.

 

Mjólkursamlagið ræður eftirlitsmenn til að fylgjast með mjólkurhúsum, tönkum og vélbúnaði við mjaltir. Leiðbeina þeir um viðhald þessara tækja og notkun þeirra. 

 

6. grein.

 

Mjólk sú, er framleiðendur afhenda úr heimilistanki, er mæld við dælingu í mjólkurflutningabifreið með löggiltum mæli. Mjólkurframleiðandi fær afrit af mælingunni hverju sinni. Framleiðendum er síðan greitt í viðskiptareikninga hjá K.S. eftir hvern innleggsmánuð skv. samandregnum mælingarnótum frá dælum mjólkurbifreiða á þann hátt, sem  kveðið er á um í gildandi lögum hverju sinni, nú lögum nr. 46/1985.

 

7. grein.

 

Við samlagið er starfræktur stofnsjóður, sem er séreignarsjóður hvers samlagsmanns. Tilgangur stofnsjóðsins er að styrkja fjárhagslega stöðu samlagsins og veita jafnframt viðskiptatryggingu fyrir samlagsmenn. Í stofnsjóð leggst 1% - einn af hundraði - af brúttóverði innlagðrar mjólkur frá hverjum framleiðanda inn á séreignarreikning hans. Í stofnsjóðsreikninga samlagsmanna reiknast vextir og/eða verðbætur skv. ákvörðun stjórnar KS að fenginni tillögu samlagsráðs. Vextir og/eða verðbætur séu þó aldrei  lægri en svo, að fé það, sem í stofnsjóðnum er, haldi verðgildi sínu miðað við verðlagsþróun í landinu.

 

Þegar samlagsmaður hefur átt viðskipti við samlagið í 10 ár er skylt, ef þess er óskað, að greiða honum þá upphæð verðtryggða, ásamt áföllnum vöxtum skv. framansögðu, sem hann lagði í sjóðinn fyrsta viðskiptaár sitt og svo áfram, þannig að innstæða hans í sjóðnum nemi aldrei lægri fjárhæð,  en sem nemur tíu ára innleggi.

Stofnsjóðsinneign samlagsmanns kemur til útborgunar:

1. Við andlát samlagsmanns.
2. Við brottflutning hans af félagssvæðinu.
3. Við gjaldþrot hans.
4. Verði hann framfærslustyrksþurfi.

 

Þó er aldrei skylt að greiða út sjóðseignina fyrr en að loknu uppgjöri viðkomandi reikningsárs.   Hætti samlagsmaður framleiðslu af öðrum orsökum fær hann eigi að síður sjóðseign sína greidda, en stjórn KS er í þeim tilvikum heimilt að krefjast þess, að viðkomandi sanni á fullgildan hátt að hann sé hættur mjólkurframleiðslu. Að öðru leyti er fé í stofnsjóði óuppsegjanlegt og verður ekki selt, veðsett né af hendi látið á annan hátt nema með samþykki stjórnar KS.

 

8. grein.

 

Kaupfélagsstjóri KS ræður samlagsstjóra, að fenginni umsögn samlagsráðs skv. 4. grein og eftir að hafa ráðfært sig við stjórn KS skv. ákvæðum í 16. grein samþykkta kaupfélagsins. Hefur hann á hendi daglegan rekstur samlagsins og afurðasölu í samráði við kaupfélagsstjóra KS. Að öðru leyti er starfssvið hans og kjör ákveðin með sérstökum samningi.

 

9. grein.

 

Samlagið heldur ársfund eigi síðar en í aprílmánuði ár hvert. Í ársfundi er gerð grein fyrir rekstri samlagsins og mjólkurflutningabifreiða. Þar er einnig leitast við að fjalla um málefni, sem varða mjólkurframleiðsluna sérstaklega, markaðs- og framleiðslumál og kynna nýjungar og annað, er til framfara horfir í mjólkurframleiðslunni.

 

Á ársfundi samlagsins eiga sæti með atkvæðisrétti allir mjólkurframleiðendur á samlagssvæðinu. Aðalfundur KS hefur æðsta vald í málefnum samlagsins sem og annarra deilda kaupfélagsins, en taka skal hann tillit til ályktana ársfundar samlagsins og tillagna samlagsráðs.

 

10. grein.

 

Um tillögur til breytinga á reglugerð þessari skal fara á sama hátt og með tillögur um breytingar á samþykktum KS, en þó ber að fjalla um slíkar breytingartillögur á ársfundi samlagsins áður en þær koma til lokaafgreiðslu á aðalfundi KS.

 

11. grein.

 

Með reglugerð þessari er felld úr gildi reglugerð samlagsins frá 1973.

 

 

 

 

REGLUGERÐ FYRIR SLÁTURHÚS KAUPFÉLAGS SKAGFIRÐINGA.

 

 

1. grein.

 

Kaupfélag Skagfirðinga starfrækir afurðastöð - sláturhús, sem er stofnun innan KS með þeirri sérstöðu, sem í þessari reglugerð felst.             

 

Stjórn Kaupfélags Skagfirðinga fer með yfirstjórn þess að fengnum tillögum sláturhúsráðs.

 

2. grein.

 

Markmið sláturhússins eru:

 

1. Að annast slátrun á búpeningi félagsmanna og annarra framleið enda, sem þess kunna að óska.
2. Að stuðla að sem mestri vöruvöndun á þeim afurðum, sem sláturhúsið tekur til meðferðar frá framleiðendum og að koma þeim í sem best verð á innlendum og erlendum mörkuðum.
3. Að stuðla að fjölbreytni í framleiðslu og vöruvali og öðru því, er gæti aukið sölu innlendra afurða.

 

3. grein.

 

Við stjórnun sláturhússins skal kaupfélagsstjórn hafa sér til ráðuneytis 5 manna sláturhúsráð, sem er skipað eins og hér greinir:

 

1. Aðalfundur KS kýs 3 menn úr hópi framleiðenda, sem jafnframt séu félagsmenn í KS og leggi afurðir sínar inn hjá sláturhúsi félagsins. Kjörtími þeirra er 3 ár. Þá kýs aðalfundur einnig 2 menn til vara til eins árs í senn og uppfylli þeir sömu skilyrði og aðalmenn.
2. Stjórn kaupfélagsins kýs úr sínum hópi einn mann og einn til vara til eins árs í senn.
3. Kaupfélagsstjóri er  sjálfkjörinn í ráðið og er hann jafnframt formaður þess. Í forföllum hans tekur staðgengill  kaupfélagsstjóra eða sá er hann setur til þess sæti hans.

 

Forstöðumanni sláturhússins er skylt að sitja fundi ráðsins og gerir hann þar grein fyrir störfum sínum og starfsemi sláturhússins, óski formaður þess.

 

4. grein.

 

Sláturhúsráð sér um að reglugerð sláturhússins sé framfylgt. Það er ráðgefandi um öll þau mál, er varða rekstur sláturhússins, fjárfestingar og önnur þau mál, er varða samskipti sláturhúss og framleiðenda. Það er ráðgefandi um ráðningu sláturhússtjóra. Kaupfélagsstjóri KS ræður sláturhússtjóra að fenginni tillögu sláturhúsráðs og eftir að hafa ráðfært sig við stjórn KS skv. 16. grein samþykkta félagsins.

 

5. grein.

 

Sláturhúsráð skal ákveða tilhögun flutninga sláturgripa til sláturhússins.

 

6. grein.

 

Sláturhússtjóri sér um daglegan rekstur sláturhússins og afurðasölu þess í samráði við kaupfélagsstjóra.

 

7. grein.

 

Formaður sláturhúsráðs  kallar saman fundi í sláturhúsráði þegar þörf krefur eða minnst 2 menn úr ráðinu krefjast þess.

 

8. grein.

 

Um breytingar á reglugerð þessari skal fara með á sama hátt og breytingar á samþykktum kaupfélagsins.

 

9. grein.

 

Með reglugerð þessari fellur úr gildi eldri reglugerð frá 30. maí 1981

 

 

Kaupfélag Skagfirðinga  |  Ártorgi 1  |  550 Sauðárkróki  |  s.455 4500